Ekspertët shëndetësorë thirrje qeverisë britanike për rikthimin e masave anti-COVID

Të premten, ekspertët shëndetësorë në Britani të Madhe i kërkuan qeverisë të sigurojë që kufizimet e koronavirusit të futen me shpejtësi, pasi shkalla e infeksioneve të reja vazhdon të rritet.

Shumë shkencëtarë po i kërkojnë qeverisë të rifusë disa nga masat që hoqi tre muaj më parë, duke përfshirë mbajtjen e maskave me detyrim në ambiente të mbyllura, distancimin shoqëror dhe vijimin e punës nga shtëpia.

Qeveria konservatore e kryeministrit Boris Johnson thotë se mund të rivendosë disa kufizime si pjesë e “Planit B” të vjeshtës dhe dimrit.

Britania e Madhe ka regjistruar mesatarisht 47.000 raste të reja të COVID-19 në ditë në javën e kaluar, 18% më shumë se një javë më parë, sipas shifrave të publikuara të premten.

Ndërkohë janë regjistruar më shumë se 139. 000 vdekje nga koronavirusi gjatë pandemisë, numri më i lartë në Evropë pas Rusisë.

Ky shtet po mbështetet pothuajse ekskluzivisht në vaksinat për të mbajtur larg virusin gjatë muajve të vjeshtës dhe dimrit.

Pothuajse 80% e njerëzve 12 vjeç e lart në Mbretërinë e Bashkuar kanë marrë dy doza vaksinash, ndërkohë po u ofrohet një vaksinë përforcuese, duke përfshirë të gjithë mbi 50 vjeç.

LEXONI GJITHASHTU:

• Thellohet përplasja SHBA-Kinë, Biden zotohet të mbrojë Tajvanin. Pekini: Tokë kineze, s’e lëshojmë
• Donald Trump prezanton rrjetin e ri social TRUTH – kundër kujt po vepron ai?