‘Dëgjoni të qarat e tokës’, mblidhet në Skoci samiti për ndryshimet klimatike

Samiti i shumëpritur i ndryshimeve klimatike COP26 ka nisur në qytetin skocez të Glasgow.

Delegatë nga rreth 200 vende marrin pjesë për të bërë me dije se cilat janë masat që do të ndërmerren për të ulur emetimet deri në vitin 2030 dhe sesi do të ndihmohet planeti ynë.

‘Veproni tani’ është thirrja e mijëra aktivistëve nga e gjithë bota që janë mbledhur në Glasgow në përpjekje për të ushtruar presion mbi liderët botërorë.

Në samit do të jetë i pranishëm edhe presidenti amerikan Joe Biden, ai frances Macron e jo vetëm. Kthimi i Shteteve të Bashkuara, ekonomisë më të madhe në botë, në bisedimet e OKB-së për klimën do të jetë një ndihmë për konferencën, pas një mungese katërvjeçare nën udhëheqjen e presidentit Donald Trump.

Me ngrohjen e klimës për shkak të emetimeve të karburanteve fosile të shkaktuara nga njerëzit, shkencëtarët paralajmërojnë se nevojitet veprim urgjent për të shmangur një katastrofë klimatike. Kryeministri i Mbretërisë së Bashkuar Boris Johnson tha se samiti do të jetë “momenti i së vërtetës në botë”.

Në meshën e së dielës nga Vatikani edhe Papa Francesku u bëri thirrje liderëve që marrin pjesë në samit dhe të dëgjojnë të “qarat” e Tokës dhe të të varfërve.

Ati i Shenjtë gjatë lutjes së tij tha se shpreson që takimi do të jepte “përgjigje efikase dhe do të ofronte shpresë konkrete për brezat e ardhshëm”.

LEXONI GJITHASHTU:

• 75 ekspertë testojnë 1800 birra në konkursin e Belgjikës
• Festë në kështjellën Frankenstein, pas një viti rikthehet Halloween me mostra e përbindësha