COP-26: Biden kërkon falje për Trump, Macron dhe të tjerët premtojnë veprim

Liderët e vendeve me ekonomitë më të mëdha dhe me emetimet më të larta të karbonit u zotuan të hënën në samitin COP-26, që nisi punimet në Glasgou, se do të veprojnë për t’i dhënë zgjidhje çështjes së klimës.

Presidenti amerikan Joe Biden u përpoq të garantonte homologët se Shtetet e Bashkuara do ta mbajnë premtimin e tyre për të shkurtuar emetimet e gazit me më shumë se gjysmën e tyre brenda dekadës, edhe pse politikat për të arritur këtë objektiv mbeten të paqarta.

Biden, i cili pason në detyrë Donald Trump, kërkoi ndjesë për tërheqjen që ky i fundit i bëri Shteteve të Bashkuara nga Marrëveshja e Parisit, kur tha se “Amerika jo gjithmonë kishte qenë një shembull për t’u marrë lidhur me çështjen e klimës”.

Ndërkohë, presidenti francez Emmanuel Macron deklaroi se negociatat që do të zhvillohen gjatë samitit duhet të rrisin ambiciet e vendet të tjera, që nuk kanë bërë mjaftueshëm për të mbajtur mesataren e temperaturës globale në 1.5 gradë Celsius.

Macron tha gjithashtu se marrëveshjet tregtare që nënshkruhen sot mes vendeve të ndryshme nuk mund t’i injorojnë më angazhimet për klimën.

Ndërsa kryeministrat e Kanadasë dhe Spanjës, Justin Trudeau dhe Pedro Sanchez njoftuan planet e tyre për të tkurrur emetimet nga nafta dhe gazi dhe për të financuar investimet në energjinë e pastër brenda vitit 2025.

Nga ana tjetër, presidentja e Komisionit Evropian, Ursula von der Leyen u shpreh se, natyra nuk mund të paguajë më çmimin e biznesit.

I shtyrë për një vit për shkak të pandemisë së COVID-19, samiti COP-26 synon të mbajë të gjallë objektivin për mbajtjen e temperaturës mesatare globale në 1.5 gradë Celsius.