Serbia po abuzon me dialogun, dëshiron destabilizimin e rajonit, thotë presidentja Osmani

Presidentja e Kosovës, Vjosa Osmani deklaroi se Serbia nuk është e interesuar në arritjen e një marrëveshjeje me Kosovën, që ka në thelb njohjen reciproke.

Sipas saj, përmes zvarritjes së marrëveshjes, Serbia dëshiron destabilizimin e rajonit të Ballkanit

“Serbia i sheh vendet që nuk janë në BE si vende të përkohshme, diçka që mund t’i shkatërrojë. Kjo nënkupton se do të ketë më shumë tentime për destabilizim”, deklaroi Osmani në një panel të organizuar nga Shkolla për Studime të Avancuara Ndërkombëtare në Universitetin Johns Hopkins, në Uashington.

Sipas presidentes Osmani, Serbia është duke abuzuar me dialogun me Kosovën – të ndërmjetësuar nga Bashkimi Evropian – duke u thënë vendeve që janë larg territorit të Ballkanit që të mos e njohin shtetësinë e Kosovës, sepse “statusi i këtij shteti është ende duke u negociuar”.

Më herët, kryeministri i Kosovës, Albin Kurti ka deklaruar se Prishtina nuk po i shmanget detyrimit për themelimin e asociacionit të komunave serbe, por kushtetuta e Kosovës nuk lë vend për asociacion mbi baza etnike. Kurti nënvizoi se Beogradi zyrtar po luan një lojë të rrezikshme në rajon.

LEXONI GJITHASHTU:

• Kurti: Për ‘Open Balkan’ duhet që Serbia të ndryshojë
• ‘Open Balkan’, Rama e Vuçiç kërkesë BE për përfshirje në tregun e përbashkët