Samiti i Demokracisë, DASH: Nuk komentojmë çështjet e brendshme pse disa vende nuk janë ftuar

Departamenti Amerikan i Shtetit bën me dije se  nuk “komenton çështjet e brendshme pse disa vende nuk janë ftuar” në Samitin për Demokraci, që organizohet nga presidenti i Shteteve të Bashkuara, Joe Biden më 9 dhe 10 dhjetor. Kosova, Serbia dhe Bosnje e Hercegovina janë ndër shtetet të cilat nuk janë ftuar, çka ka ngjallur shumë debat.

“Presidenti Biden është zotuar të jetë mikpritës i Samitit të Demokracisë për të forcuar angazhimin tonë për pozicionimin e demokracisë dhe të drejtave të njeriut në zemër të politikës së jashtme të SHBA-së”, u shpreh një zëdhënës i Departamentit të Shtetit për Zërin e Amerikës, në gjuhën serbe.

DASH nënvizon se Shtetet e Bashkuara nuk përpiqen të përcaktojnë cilat shtete janë demokrate e cilat nuk janë. Një grup i organizatave joqeveritare nga Kosova, ka kërkuar përmes një letre që Shtetet e Bashkuara të rishohin ftesën e Kosovës për të marrë pjesë në Samitin për Demokraci.

“Kosova meriton të jetë pjesë e Samitit”, kështu u shpreh për Euronews Albania analisti nga Kosova Naim Rashiti, duke shtuar se mungesa e ftesës mund të jetë edhe një mesazh.

Ambasadori i SHBA në Serbi, Anthony Godfrey, ka deklaruar se jo të gjithë partnerët kanë mundur të ftohen në Samit.

Duke komentuar mungesën e ftesës për Serbinë, presidenti Vuçiç, pak ditë më parë u shpreh se secili vend ka të drejtë të zgjedhë se kë dëshiron të ftojë.

Media amerikane Politico ka bërë me dije se nga rajoni i Ballkanit Perëndimor, janë ftuar Shqipëria, Mali i Zi dhe Maqedonia e Veriut.