Përshkallëzohen tensionet në kufirin Poloni-Bjellorusi

Në afërsi të fshatit kufitar, qindra emigrantë që ndodhen në tokën bjelloruse tentuan të shkatërrojnë gardhin me tela për të kaluar drejt Polonisë, duke përshkallëzuar situatën tashmë të tensionuar mes dy vendeve.

Ushtarët polakë ndaluan me sukses përpjekjen e emigrantëve. Ndërkohë, ushtarët bjellorusë janë parë duke ndihmuar emigrantët.

Më shumë se  15,000 trupa polake janë vendosur në kufi pasi konflikti dita ditës përshkallëzohet.

Autoritetet bjelloruse kanë thënë se po dërgojnë ndihma duke përfshirë tenda dhe mjete ngrohëse në kampin e emigrantëve, një lëvizje që mund ta shndërrojë në një situatë thuajse të përhershme në kufijtë e BE-së.

Shërbimi Shtetëror i Rojës Kufitare i Lituanisë ka shpërndarë një video ku duken rreth 70 emigrantë që ecnin përgjatë kufirit të saj në anën bjelloruse.

Sipas videos pretendohet  se emigrantët u kanë thënë oficerëve se ishin sjellë nga zyrtarët bjellorusë nga kufiri me Poloninë. Grupi eci për shumë kilometra përgjatë lumit Nocia që ndan Lituaninë nga Bjellorusia.

Kriza emigrantëve ka shtuar tensionet mes Minskut dhe Brukselit ndërsa palët akuzojnë njëra-tjetrën për përdorim te emigranteve për qëllimet e tyre politike.