SHBA kritikon Rusinë, raketa anti-satelit e lëshuar nga Moska kërcënoi jetën e 7 astronautëve

Shtetet e Bashkuara akuzuan Rusinë për sjellje “të papërgjegjshme dhe të rrezikshme” pas testimit të një rakete anti-satelit, që sipas Uashingtonit kërcënoi jetët e 7 astronautëve në bordin e Stacionit Hapësinor Ndërkombëtar.

“Sjellja e rrezikshme dhe e papërgjegjshme e Rusisë vë në rrezik qëndrueshmërinë afatgjatë të projekteve hapësinore dhe tregon se deklaratat e Moskës se kundërshton armatimin e hapësirës janë të pasinqerta dhe hipokrite. Shtetet e Bashkuara do bashkëpunojnë me aleatët për t’iu përgjigjur papërgjegjshmërisë së Rusisë”, tha Ned Price, zëdhënës i Departamentit të Shtetit.

Rusia qëlloi një raketë ndaj një prej satelitëve të saj, duke gjeneruar mbi 1.500 copëza në orbitë, që sipas SHBA, kërcënojnë interesat e të gjitha vendeve.

“Kjo është një situatë emergjente, një situatë emergjente e llogaritur. Ne dimë se çfarë të bëjmë në këtë moment, nëse ndodh diçka. Edhe Qendra e Kontrollit të Misioneve e di”, u shpreh Alexander Lazutkin, kozmonaut.

Shtatë kozmonautët në bordin e Stacionit Hapësinor Ndërkombëtar, mes të cilëve dy rusë, u detyruan të strehoheshin në kapsulat e tyre në momentin që copat e satelitit fluturuan pranë stacionit.