Bullgaria akuzon Turqinë për ndërhyrje në zgjedhjet parlamentare

Ministri i Brendshëm në Bullgari Bojko Rashkov akuzon Turqinë për ndërhyrje në punët e brendshme bullgare gjatë zgjedhjeve presidenciale dhe parlamentare të mbajtura më 14 nëntor.

Ministria e Jashtme thirri ambasadorin turk në Sofje për shpjegime.

“Bullgaria pret që institucionet turke të përmbahen kategorikisht nga veprimet propagandistike dhe mesazhet politike në lidhje me procesin zgjedhor në vendin tonë gjatë balotazhit të zgjedhjeve presidenciale”, thuhet në njoftimin e qeverisë bullgare.

Partia e pakicës turke në Bullgari DPS mori më shumë se 87,000 vota gjatë zgjedhjeve parlamentare të vendit.

Pothuajse të gjitha votat erdhën nga qendrat e votimit në Turqi, ku votimi u zhvillua me pjesëmarrje të lartë të shtetasve turq që kanë edhe pasaporta bullgare.

Gjatë zgjedhjeve të mëparshme parlamentare në korrik, numri i votuesve në seksionet turke ishte tre herë më i ulët.

Qeveria e përkohshme ka frikë se pjesëmarrja e lartë në Turqi mund të jetë vendimtare në balotazhin presidencial të 21 nëntorit.

Rashkov gjatë vizitës së tij në qytetin jugor bullgar të Karxhalit para zgjedhjeve, tha se qytetarët bullgarë të etnisë turke ishin kërcënuar.

Ministria e Jashtme turke mohoi pretendimet se votuesit bullgarë ishin drejtuar nga autoritetet turke gjatë zgjedhjeve presidenciale dhe parlamentare të 14 nëntorit në Bullgari.

Ministria e cilësoi të pavend që i dërguari i Ankarasë ë në Sofje u thirr nga ministria e jashtme bullgare dhe u akuzua për pretendime “të pabaza”.