Zemmour shpall kandidaturën, ‘Trumpi francez’ synon presidencën në zgjedhjet e ardhshme

Një kandidat i ri është vetëdeklaruar për zgjedhjet presidenciale në Francë. Eric Zemmour, ish-gazetar i politikës dhe analist televiziv e zyrtarizoi kandidaturën e tij të martën, përmes një videoje të shpërndarë në internet.

I konsideruar nga vëzhguesit si një politikan që i përket spektrit të së djathtës ekstreme, Zemmour i ka fokusuar fjalimet e tij tek çështje si emigracioni dhe identiteti kombëtar, duke u ndaluar tek zëvendësimi i popullsisë franceze nga emigrantët joevropianë.

Çështje këto që i mundësojnë atij sot të kërkojë një pjesë të votave nga Marine Le Pen, rivalja e tij brenda së djathtës ekstreme dhe njëkohësisht kandidate për kryetare shteti, e cila arriti në raundin e dytë të zgjedhjeve presidenciale në 2017-n.

Një figurë kontradiktore, e mësuar me polemikat, Eric Zemmour është dënuar dy herë në të kaluarën për nxitje të urrejtjes racore.

Kandidimi i tij vjen përpara kongresit të republikanëve, partia tradicionale e së djathtës, një pjesë e elektoratit të të cilës është tashmë e joshur nga fjalimet e tij.