Artisti nga Pogradeci sjell piktorët botërorë në kafka

Leonardo da Vinçi, Salvador Dali, Pablo Picaso e të tjerë piktorë të famshëm botërorë janë rijetësuar për herë të parë në një ekspozitë pirografike në Pogradec.

Andi Mitllari është 22 vjeçari nga ky qytet, i cili ka vendosur t’i sjellë këta piktorë në vëmendje, por në formën përfundimtare të kafkës.

“Ekspozita quhet ‘Klinika Dora’ dhe përbëhet nga 15 piktorë të cilët kanë ndërruar jetë, dhe unë kam bërë transformim e tyre në skelete, që është dhe forma përfundimtare e njeriut e pamja finale që ne marrim”, tha Mitllari.

Frymëzimi për këtë ekspozitë erdhi nga Salvador Dali, ndërkohë ekspozita është pritur mjaft me kërshëri nga pogradecarët, edhe pse në një format ndryshe nga herët e tjera që ata janë mësuar të shohin.

“Ai që me dha frymëzimin ishte Salvador Dali, i cili është edhe idhulli im. Ai ishte modeli i parë që realizova. Pastaj mendova, pse jo mos t’i bashkëngjis dhe piktorët e tjerë. Kisha dyshime se nuk do të pritej aq mirë pasi pjesa e të qenit skelet, por përkundrazi u pëlqye shumë dhe kam marrë shumë përgëzime për idenë”, u shpreh ai.

Ekspozita e parë e këtij formati në Pogradec qëndroi e hapur për 3 ditë në Galerinë e Arteve. Synimi I artistit të ri është që projekti të udhëtojë nëpër Shqipëri.