Ish-polici infektoi prindërit në Mirditë, mjeku zbulon gjendjen e tyre shëndetësore

Një ish- polic i burgut nga Mirdita u vu se fundmi nën shënjestrën e kryeministrit pasi duke thyer karantinën, ai vizitoi prindërit e tij duke i infektuar mëpas me COVID-19.  Sipas kreut të qeverisë, ky person do të përballet me dënimet administrative dhe ndoshta edhe penale.

Por pavarësisht nga çfarë është shprehur kryeministri, Kodi Penal hyn ne fuqi me datën 8 maj. Pikërisht për ketë, Presidenti Ilir Meta i kërkoi autoriteteteve të lajmërojnë të gjithë personat e prekur në lidhje me dënimet e reja që parashikon ky kod.

Por pas reagimeve, kunati i ish-policit që infektoi prindërit, Gjon Caka ka folur duke dhënë një version tjetër. Sipas kunatit, ish-polici kishte kërkuar t’i bënin tamponin nëse ishte i infektuar me COVID-19 por askush nuk i ishte përgjigjur duke qenë se ishte asimptomatik. “Shkuarja e tij në Mirditë tek prindërit nuk ishte për vizitë, por sepse ishin prindërit ata që e thirrën për të bërë disa rregullime në shtëpi. Pikërisht nga kjo vizite, u infektuar te dy prindërit”, tha ai.

Ditë me vonë, kur simptomat ishin shfaqur, ish-polici i burgut kishte kërkuar sërish të bënte tamponin por vetëm nëpërmjet ndërhyrjeve me miqtë kishte siguruar një të tillë ku mësoi se ishte pozitiv ndaj COVID-19.

Emisioni “Ilva Now” zhvilloi një bisedë me mjekun epidemiolog, Aleksandër Picaku, i cili i ka nën patronazh prindërit e ish-policit në Mirditë. Ai theksoi se gjendja e tyre shëndetësore është shumë e mirë, ndërsa shtoi se ata janë  asimptomatikë dhe po marrin ndihmën e nevojshme mjekësore.

“Gjendja shëndetësore është e kënaqshme nuk kanë asnjë shenjë klinike. Gëzojnë shëndet të plotë dhe të gjithë parametrat jetësorë janë normale. Janë asimptomatikë të plotë. Gjendja e tij (ish-policit) nuk e dimë, sepse ai ndodhet në Tiranë se është i izoluar. Ndihma atyre nuk iu ka munguar në asnjë sekondë, si me ushqime si me ndihma mjekësore. Medikamentet janë dhënë në kohën dhe momentin e duhur. Ata janë të vetëizoluar”, tha ai.