Sa herë mund të votohet në pyetësorin e qeverisë?

Pyetësorët e qeverisë për qytetarët po shpërndahen prej disa ditësh. Plotësimi anonim bëhet nga telefoni, kompjuteri ose në një letër me postë.

Qytetarët mund të votojnë sa herë të duan në kompjuterë apo telefona të ndryshëm. Me postë vjen vetëm një fletë në shtëpi, ama në mënyrë elektronike nuk ka sesi qytetarët të ndalohen për të votuar disa herë.

Sa vend për abuzim lë diçka e tillë?

Për këtë, Euronews Albania e plotësoi pyetësorin fillimisht në kompjuter, ku zgjodhëm si përgjigje alternativën A. Në telefon zgjodhëm alternativën B, ndërsa në letër C.

Këtë mënyrë mund të zgjedhin edhe qytetarë të tjerë të cilët mund ta plotësojnë pyetësorin më shumë se një herë. Por a mund të parandalohet kjo?

 “Sistemi në të cilin hidhen të dhënat e këtij pyetësori ka disa algoritme të cilat verifikojnë mënyrën sesi pyetësori plotësohet. Kështu që do të sigurohemi që të mos kemi dublikime të pyetjeve. Numërohet si një pyetësor i vetëm, nuk numërohet si një, dy, tre, katër e kështu me radhë,” – deklaroi drejtorja e Agjencisë për Dialog dhe Bashkëqeverisje.

Specialisti i teknologjisë, Gerond Taçi mohon që të zbulohet plotësimi disa herë i pyetësorit.

 “Normalisht nuk mund të zbulohet pasi shkelen të drejtat e privatësisë dhe kalojmë në një fushë tjetër, por me mekanizmat aktuale browersat apo mënyrat sesi ne udhëtojmë apo eksplorojmë internetin këto vegla ne na mbrojnë identitetin,” – u shpreh ai.

Ky pyetësor do t’i kushtojë qeverisë 25 milionë lekë të cilat i shpërndahen Agjencisë për Dialog dhe Bashkëqeverisje dhe INSTAT.

LEXONI GJITHASHTU: 

• ‘Sondazhi’ i qeverisë, qytetarët pyeten për legalizimin e kanabisit