Banorët e 5 Majit po mashtrohen nga bashkia, pretendon Berisha

Sali Berisha akuzoi se dokumenti që po u ofrohet banorëve të 5 Majit nga bashkia është mashtrim.

Sipas ish-kryeministrit, bashkia me mbështetjen e qeverisë po ofron marrëveshje që janë vetëm për përfitime vetjake dhe jo në ndihmë të qytetarëve.

“Unë kam studiuar me vëmendje dokumentin që u ofrohet banorëve. Është absolutisht fund e krye mashtrimi. Ai nuk përbën marrëveshje, pro thjesht një akt vetëdeklarimi para noterit. Ndërkohë që një marrëveshje mes palëve kërkon firmën e të dy palëve dhe noterizimin e këtij dokumenti,” – tha Berisha.

Ish-kryeministri pretendon se kërkesa e bashkisë për vetëdeklarimin e noterizuar është në mënyrë që bashkia dhe qeveria të marrin katet që iu duhen, pa u shqetësuar për banorët që po iu shkatërrohen shtëpitë.

“Në Shqipëri dhe gjithë botën ekziston ligji i posedimit të pronës. Ligj që pas një afati të caktuar ai që posedon pronën është pronari dhe pronari dëmshpërblehet,” – sqaroi Berisha.

Ai u bëri thirrje qytetarëve të solidarizohen me protestën e banorëve të 5 Majit.

Berisha e dha deklaratën ndërsa po futej në parlament, ndërsa banorët po protestonin para ambasadës amerikane.

Prej disa javësh në zonën e ‘5 majit’ në Tiranë ka nisur shembja e banesave, në kuadër të procesit të rindërtimit. 400 banesa pritet të shemben në total, por vetëm disa prej tyre kanë pësuar dëme nga tërmeti i nëntorit 2019.

LEXONI GJITHASHTU:

• Banorët e 5 Majit: Të prishen banesat kur të zgjidhet strehimi