Kurti: Në 2 muajt e fundit kemi importuar 40% të energjisë

Për rritjen e çmimit të energjisë në Kosovë, kryeministri Albin Kurti është shprehur se në dy muajt e fundit kanë importuar 40 përqind të energjisë elektrike.

Ai nënvizoi se vetëm për një ditë kanë paguar 2.5 milionë euro për blerjen e energjisë.

“Na është dashur të importojmë 40 përqind të energjisë elektrike, vetëm për 1 ditë dhe kemi paguar 2.5 milionë euro. Por një formë e tillë e subvencionimit është e papërballueshme për buxhetin e Kosovës. Tarifat e reja praktikohen vetëm për ata që shpenzojnë mbi 800 kilovat orë”, sqaroi kryeministri i Kosovës.

Në Kosovë është shtrenjtuar çmimi i energjisë elektrike për konsumatorët që shpenzojnë mbi 800 kilovat në orë.

Konsumatorët e tarifës mbi 800 kilovat në orë do të kenë tarifën e lartë prej 12.5 cent për kilovat dhe 5.9 cent për tarifën e ulët. Për konsumatorët që shpenzojnë deri në 800 kilovat në orë, tarifa e lartë do të jetë 7 cent, ndërsa ajo e ulët, 3 cent.