Mosshkarkimi i Metës, SHBA: Gjykata po tregon pavarësi dhe integritet

Gjykata Kushtetuese po demonstron aftësinë për të përmbushur funksionin e saj parësor duke dhënë vendime që pasqyrojnë pavarësi dhe integritet.

Kështu thuhet në një reagim të ambasadës amerikane lidhur me vendimin e Gjykatës Kushtueses që rrëzoi kërkesën e Kuvendit për shkarkimin e presidentit Ilir Meta.

“Gjykata Kushtetuese e Shqipërisë, e cila u bë funksionale në dhjetor të vitit 2020, po demonstron aftësinë për të përmbushur funksionin e saj parësor dhe thelbësor duke shqyrtuar faktet dhe argumentet e paraqitura nga palët përkatëse, duke diskutuar mbi këto fakte dhe argumente në bazë të Kushtetutës dhe duke dhënë vendime që pasqyrojnë pavarësi dhe integritet”, shkruhet në deklaratën e publikuar në faqen zyrtare të ambasadës në Facebook.

Në vijim theksohet mbështetja e Shteteve të Bashkuara të Amerikës për zbatimin e reformës në drejtësi, “përfshi një gjyqësor profesional, të pavarur, si institucion thelbësor për të garantuar shtetin ligjor, si dhe ndarjen dhe balancimin e pushteteve”.

Gjykata Kushtetuese vendosi të mërkurën për rrëzimin e shkarkimit të Ilir Metës nga posti i presidentit. Sipas Gjykatës, faktet e paraqitura nuk përbëjnë shkelje të rëndë të Kushtetutës.

LEXONI GJITHASHTU:

• Gjykata Kushtetuese rrëzon shkarkimin e Metës
• 6 gjyqtarët që votuan kundër shkarkimit të presidentit Meta