Gjykata pezullon zgjedhjet në FSHF

Gjykata e Tiranës ka pezulluar zgjedhjet për kreun e Federatës Shqiptare të Futbollit.

Shkak për këtë vendim është shqyrtimi i akuzave për manipulime nga ana e Bashkisë së Tiranës dhe kreut aktual të FSHF, Armand Duka.

Asambleja ishte parashikuar të mbahej në 2 mars. Në garë për kreun e FSHF janë Armand Duka, Dritan Shakohoxha, Sulejman Starova.

Çështja e zgjedhjeve rajonale për FSHF u zhvilluan në klimë tensioni me akuza dhe kundërakuza. Për këtë në Tiranë ndodhen prej 3 ditësh edhe 3 zyrtarë të UEFA-s të cilët po shqyrtojnë procedurat e ndjekura.

Situata e tensionuar kulmoi në zgjedhjet në shoqatën rajonale të Tiranës ku 18 delegatë u larguan në mënyrë demonstrative pas fillimit të Asamblesë.

Në Durrës u kallëzua penalisht një delegat i zgjedhur, për shpërdorim detyre pasi nuk kishte asnjë autorizim si përfaqësues i klubit Erzeni.

Kryetari i bashkisë së Tiranës Erion Veliaj ka dalë hapur kundër kreut aktual të federatës Armand Duka i cili kërkon një mandat të 6.

Juristë pranë bashkisë pretendojnë se në Asamblenë e Tiranës por edhe shoqata të tjera, kanë votuar njerëz anonimë ndërsa përfaqësues të federatës e cilësojnë këtë një ndërhyrje të politikës.

Pala kundërshtare e Dukës ka paralajmëruar dërgimin e çështjes në gjykatë duke kërkuar edhe një hetim ndërkombëtar për kreun e FSHF-së.

LEXONI GJITHASHTU:

• Presidenti i UEFA-s në Tiranë në prag të zgjedhjeve në FSHF
• Akuzat për manipulim në luftën për FSHF