Rusia nis operacionet ushtarake në Ukrainë, Kievi e quan shpallje lufte

Presidenti Vladimir Putin autorizoi një operacion ushtarak kundër Ukrainës të enjten në mëngjes për të eliminuar atë që ai e quajti një kërcënim serioz, duke thënë se qëllimi i tij ishte të çmilitarizonte fqinjin jugor të Rusisë.

Në një fjalim herët në mëngjes në televizionin shtetëror, Putin tha se nuk i kishte mbetur zgjidhje tjetër veçse të niste operacionin.

“Kam vendosur të kryej një operacion ushtarak. Qëllimi i tij është të mbrojë njerëzit që janë nënshtruar bullizmit dhe gjenocidit për tetë vitet e fundit. Për këtë ne do të përpiqemi për çmilitarizimin dhe denazifikimin e Ukrainës”, u shpreh Putin.

Autoritetet në Kiev e kanë cilësuar këtë veprim shpallje lufte.

Menjëherë, Presidenti ukrainas Volodymyr Zelenskyy shpalli gjendjen ushtarake dhe tha se Rusia ka nisur sulme kundër infrastrukturës kufitare dhe ushtarake.

Ai paralajmëroi vendet e tjera se çdo përpjekje për të ndërhyrë do të çonte në “pasoja që nuk i keni parë kurrë”.

Presidenti i SHBA Joe Biden thotë se bota “do ta mbajë Rusinë përgjegjëse” dhe kreu i NATO-s e quajti veprimin e Rusisë një shkelje të ligjit ndërkombëtar dhe një kërcënim për sigurinë e Evropës dhe aleatëve të saj në Atlantik.