FemFest, festivali për të drejtat e gruas që u mbajt për herë të parë në Tiranë

FemFest, një festival katër-ditor kushtuar gruas u mbajt për herë të parë në Shqipëri.

Ky festival i organizuar me rastin e 8 marsit, ka për qëllim sensibilizimin e shoqërisë për të drejtat e barabarta të grave.

Festivali u nda në disa lloje aktivitetesh, diskutime  mbi tema që lidhen me ndërgjegjësimin për të drejtat e gruas, instalacione artistike, këngë dhe shfaqje teatrale.

Pjesëmarrës në këtë festival ishin artistë të njohur shqiptarë, aktivistë dhe qytetarë.

Gjatë FemFest u zhvilluan 5 shfaqje teatrale në Teatrin Kombëtar, 2 prej të cilave ishin premiera. “Trupi im i mire”, nën regjinë e Altin Bashës, “Vdis duke qeshur”, nën regjinë e Ilir Bokshit, “Burka e Medeas” me regjisore Ema Andrean, “Unë jam vetë grua” me regjisor kushtrim Koliqin dhe “Rrefimet tona”, me regjisore Driada Dervishin.

Interesante dhe domethënëse për këtë festival është që të ardhurat e mbledhura nga biletat do të shkojnë për 4 bursa studimi për studentet më të mira të Universitetit të Arteve në Tiranë.

Dita e fundit e festivalit, 8 marsi, nisi me marshim-instilacionin artistik “Këpucët e kuqe” te sheshi “Skënderbej”, por edhe në Korçë e në Durrës. “Këpucët e kuqe” është një fushatë kundër dhunës së grave, e nisur në Meksikë në vitin 2009.

Gjatë kësaj fushatë, këpucë të kuqe shpërndahen në pika të ndryshme të qytetit, si simbol i gjakut të derdhur të grave të dhunuara. Këpucët mblidhen nga kontributi i vetë qytetareve.

Drejtore ekzekutive e FemFest është skenografja dhe kostumografja Ilirjana Basha, ndërsa për këtë projekt kanë bashkëpunuar Shoqata Bash-Art me shoqatën #ejanneteater.

FemFest vjen për herë të parë, duke përbërë sjellë risi për ndërgjegjësimin ndaj të drejtave të grave në Shqipëri.