Luftime në Kiev, 2 persona humbin jetën

Sulmet ruse në Ukrainë iu afruan edhe më shumë qendrës së Kievit paraditen e së martës, me raketa nga ajri që goditën lagje të banuara të kryeqytetit.

Dy persona humbën jetën gjatë sulmit në perëndim të Kievit ku një pallat 16 kate i lartë mori flakë pasi u godit me raketa. 46 persona u shpëtuan nga ndërtesa e shkatërruar.

Të paktën katër ndërtesa rezidenciale janë goditur me raketa nga ajri paraditen e së martës, sipas shërbimit të emergjencës ukrainase.

Ndërkohë në Mariupol një karvan me thuajse 160 makina civilësh arriti të largohej nga qyteti pas thuajse dy javësh bllokim.

Rreth 350.000 civilë vijojnë të jenë të bllokuar në Mariupol sipas përllogaritjeve të zyrtarëve atje.

Lejimi i hyrjes së ndihmave dhe largimit të civilëve është kërkesë e hershme e Ukrainës gjatë bisedimeve me Rusinë.

Ukraina dhe Rusia vijojnë raundin e katërt të bisedimeve për armëpushim. Deri më tani thuajse 3 milionë qytetarë Ukrainas janë larguar nga vendi.