Arrestimet për Teatrin, Meta thirrje urgjente strukturave: Lironi të burgosurit politikë në Shqipërinë e 2020

Presidenti i Republikës Ilir Meta, ka kërkuar lirimin e menjëhershëm të qytetarëve dhe aktivistëve, të cilët janë arrestuar dhe ndaluar për rezistencën kundër shembjes së Teatrit Kombëtar.

Me një shënim në rrjetin social “Facebook”, Meta shprehet se arrestimet e bëra për mbrotjen paqësore për teatrin janë thjesht politike.

“Të gjitha arrestimet, ndalimet dhe procedimet për mbrojtjen paqësore të Teatrit Kombëtar janë vetëm politike.Vetë operacioni për shembjen e tij ishte kryevepra e asgjësimit përfundimtar të çdo iluzioni për ekzistencën e shtetit të së drejtës në Shqipëri.Lironi të burgosurit politikë në Shqipërinë e 2020”, shkruan Meta. 

Gjykata e Tiranës pritet të japë sot në orën 11:30 minuta masën e sigurisë për 8 të ndaluar në protestën e 17 majit për mbrojtjen e Teatrit Kombëtar. Seanca po zhvillohet në këto momente, ndërkohë aktivistët e Lëvizjes Vetëvendosje janë mbledhur në protestë përpara Gjykatës për të kërkuar lirimin e qytetarëve të arrestuar. 

Kreu i Shteti ka qenë një zë kritikë ndaj qeverisë dhe bashkisë për prishjen e godinës së Teatrit Kombëtar. Ai e ka cilësuar këtë veprim si krim “të paaministueshëm”.

Lexoni gjithashtu: 

Masa e sigurisë për të arrestuarit e Teatrit, Lëvizja Vetëvendosje në protestë para gjykatës