Kurti diskuton me Escobar mbi sigurinë në Ballkanin Perëndimor

Kryeministri i Kosovës, Albin Kurti është takuar me zv.ndihmës Sekretarin Amerikan të Shtetit për Çështje të Evropës, Gabriel Escobar.

Takimi i Kurtit me zyrtarin amerikan, i cili është dhe i dërguar i posaçëm i SHBA për Ballkanin Perëndimor është mbajtur gjatë Forumit Ekonomik të Delfit që po zhvillohet në Greqi.

Në takim Kurti dhe Escobar kanë diskutuar rreth zhvillimeve në Evropë dhe në Ballkanin Perëndimor dhe rëndësinë e paqes dhe stabilitetit në këtë rajon, me theks te pushtimi rus në Ukrainë.

Duke theksuar ndikimin rus dhe rrezikun e nxitjes së konflikteve të mundshme në vendet e Ballkanit Perëndimor, Kurti ka folur për nevojën e kthimit të vëmendjes për sigurinë në rajon dhe investimeve në Kosovë.

I spoke w/ 🇺🇸 @StateEUR Gabriel Escobar about critical issues: good democratic & economic indicators from the 1st year in government, dialogue in Brussels, Kosova’s alignment w/ the EU & US in sanctioning Russian unprovoked aggression in Ukraine, & Kosova’s solidarity w/ Ukraine. pic.twitter.com/bYUFB3zwJr

— Albin Kurti (@albinkurti) April 8, 2022

Kryeministri Kurti ritheksoi domosdoshmërinë e integrimit të plotë të Ballkanit Perëndimor në NATO dhe Bashkim Evropian, për garantimin e paqes dhe stabilitetit në rajon dhe kontinentin e Evropës.

Escobar ka konfirmuar mbështetjen e SHBA për Kosovën, sovranitetin e saj territorial dhe synimet drejt integrimeve evropiane dhe euroatlantike.