Shtyhet seanca kundër gjyqtarit të vetingut Luan Daci

Gjykata e Posaçme vendosi sot të shtyjë për të dielën, 24 maj, seancën gjyqësore në të cilën pritej të komunikohej masa e pezullimit nga detyra ndaj gjyqtarit Luan Daci, i cili është dhe anëtar i Kolegjit të Posaçëm të Apelimit (KPA).

Në seancën e sotme, Daci, përmes avokatit të tij Andi Duraj, ka paraqitur raport mjekësor.

Daci në vitet 1994-1997 ka ushtruar funksionin e Gjyqtarit në Gjykatën e Rrethit Gjyqësor Tiranë.

Anëtari i KPA-së, u akuzua nga Struktura e Posaçme Anti-Korrupsion se ka fshehur shkarkimin nga detyra e gjyqtarit në vitin 1997.

Në një kallëzim të ngritur më 17 janar të këtij viti nga prokurori Besnik Cani, u konstatua se më 24 dhjetor 1997 Daci qe shkarkuar nga Këshilli i Lartë i Drejtësisë për paaftësi dhe shkelje ligjore.

KPA është trupa e dytë e procesit të vetingut që kontrollon pasurinë, profesionalizmin dhe integritetin e gjyqtarëve dhe prokurorëve në sistemin e ri të drejtësisë.

Lexoni gjithashtu:

Procedohet gjyqtari i ‘Vetingut’, nuk kishte deklaruar masën disiplinore kundër tij