4 vende të BE-së njoftojnë planet kundër rritjes së çmimeve të energjisë

Katër vende të Bashkimit Evropian kanë njoftuar marrjen e masave me vlerë 80 miliardë euro për të mbrojtur konsumatorët dhe bizneset nga rritja e çmimeve të energjisë, e nxitur edhe nga konflikti Rusi-Ukrainë.

Kështu, Franca, Gjermania, Italia dhe Spanja po shkurtojnë taksat ose po financojnë uljen e çmimeve për karburantet, elektricitetin dhe gazin natyror.

Konkretisht, Franca po aplikon një reduktim prej 0.15 euro për litër për karburantet, masë kjo që do të zgjasë deri në fund të korrikut të ardhshëm.

Gjermania planifikon të shkurtojë për tre muaj çmimet e hidrokarbureve, me 0.3 euro për litër për naftën dhe 0.14 euro për dizelin.

Ndërsa Italia njoftoi në shkurt se do të shpenzonte rreth 6 miliardë euro për të ndihmuar barrën e faturave të energjisë.

Nga ana tjetër, në Spanjë, i ashtuquajturi “Plani i Krizës” me vlerë 16 miliardë euro do të nisë nga zbatimi në prill dhe do të zgjasë për të paktën tre muajt e ardhshëm.

Qeveria e kryeministrit Sançez do të subvencionojë çmimet e karburanteve me 0.2 euro për litër dhe do të ofrojë 450 milionë euro në ndihmë direkte për kompanitë e transportit.

LEXONI GJITHASHTU:

• Shqipëria blen 300 milionë euro energji për 6 muaj, nis faza e kursimit