Boris Xhonson kërkon falje për skandalin e festave në kohë COVID-i

Kryeministri britanik Boris Xhonson ka bërë një apologji të thellë për pjesëmarrjen në festën ilegale të mbajtur gjatë bllokadës anti-COVID.

Megjithatë, ai tha se nuk kishte qenë në dijeni se kishte shkelur rregullat, apo se kishte keqinformuar Parlamentin.

“Më lejoni të them, jo për të lehtësuar apo justifikuar pozitën, por për të sqaruar fjalimet e mia të mëparshme në këtë Dhomë, se nuk e kuptova atëherë apo më pas se mbledhja e kabinetit përpara një takimi mbi strategjinë anti-COVID do të përbënte shkelje të rregullave. E përsëris se ky ishte gabimi im dhe kërkoj falje pa rezerva”, tha Xhonson.

Javën e kaluar, Xhonson u gjobit me 50 paund për pjesëmarrje në festën e tij të ditëlindjes, në qershor të vitit 2020.

Ai është lideri i parë i Britanisë moderne që gjobitet për shkelje të ligjit, por me këmbëngulje ka sfiduar thirrjet e vazhdueshme të opozitës për të dhënë dorëheqjen.

LEXONI GJITHASHTU:

• Gruaja e mikut të Putinit i lutet Boris Xhonsonit që ta lirojë