SHBA do të dërgojë më shumë armatime luftarake në Ukrainë, thotë Bajden

Presidenti amerikan, Xho Bajden deklaroi se SHBA do të dërgojë më shumë armatime luftarake në Ukrainë.

Deklaratën, Bajden e dha pas mbërritjes në New Hampshire, teksa u pyet nga gazetarët nëse planifikon të furnizojë Ukrainën me më shumë artileri.

CNN raporton se dërgesat nga paketa e fundit e ndihmës prej 800 milionë dollarësh ka mbërritur në Ukrainë, duke përfshirë pajisje të rënda, si 11 helikopterë Mi-17, 18 topa Howitzer 155 mm dhe 300 dronë të tjerë Switchblade.

Lufta në Ukrainë vijon ndërsa kërkesa e tyre e vazhdueshme është furnizimi me armë, për t’u rezistuar sulmeve të ushtrisë ruse.

Presidenti Bajden bëri me dije më 13 prill, se SHBA do të ofrojë një ndihmë shtesë prej 800 milionë dollarë ndihmë ushtarake për Ukrainën.

Bashkë me këto fonde, në total ndihma e SHBA-së për Ukrainën arrin në më shumë se 2.4 miliardë dollarë.

LEXONI GJITHASHTU

• SHBA i ofron 800 milionë dollarë ndihmë ushtarake Ukrainës