Biden vlerëson gazetarët në darkën tradicionale: Kuraja juaj pasqyroi Ukrainën

Ajo është një rast i mirë për të vlerësuar gazetarinë dhe për të bërë pak humor me presidentin amerikan. Por darka e korrespondentëve e mbajtur në Shtëpinë e Bardhë mori tone serioze.

Me luftën në Ukrainë që vazhdon, Joe Biden mbajti një fjalim të ngrohtë jo vetëm për gazetarët në Amerikë, por në të gjithë globin.

“E qartë është, dhe këtë e them me gjithë zemër, se ju, shtypi i lirë, jeni më të rëndësishëm se ç’ishit shekullin e kaluar. E kam seriozisht. Gjithmonë kam besuar se gazetaria e mirë është një pasqyrë ndaj vetes tonë, për të reflektuar të mirën, të keqen dhe të vërtetën. Sot dua të uroj të diplomuarit dhe fituesit e bursave që marrin përsipër vijimin e traditës. E kemi parë të gjithë kurajën e popullit ukrainas falë kurajës së reporterëve amerikanë në këtë dhomë dhe kolegëve të tyre në të gjithë botën, që ndodhen në terren duke vënë jetën në rrezik”, tha presidenti Biden.

Kjo është hera e parë që një president ndjek eventin në 6 vitet e fundit. Ky rast shënoi gjithashtu pjesëmarrjen e parë të Biden si kryetar shteti, edhe pse më parë ka qenë i pranishëm si zëvendës i Barack Obama.

LEXONI GJITHASHTU:

• Ndryshojnë aleancat, mediat serbe kundër deklaratës së Putinit për Kosovën
• Si po e mbulojnë mediat ruse pushtimin e Ukrainës?