FOTO/ Forcat ajrore shqiptare me helikopterë “Black Hawk”, Yuri Kim: Krah për krah si aleatë sot dhe nesër

Është nënshkruar sot kontrata e pranimit për pajisjen e Forcës Ajrore me helikopterë të tipit “Black Hawk”, financim i përbashkët i qeverisë shqiptare dhe asaj amerikane.

në një ceremoni të zhvilluar në bazën ajrore të Farkës kontrata u nënshkruar nga ministrja e Mbrojtjes, Olta Xhaçka dhe ambasadorja e Shteteve të Bashkuara në vendin tonë, Yuri Kim

“Helikopterët “Black Hawk” që shumë shpejt do të jenë pjesë e Forcës tonë Ajrore, investimi kolosal në Bazën e Kuçovës, sistemi i radarëve pas marrëveshjes me kompaninë amerikane Lockeed Martin, janë tregues se Forca Ajrore shqiptare dhe Forcat e Armatosura po ringrihen me hapa të sigurt”, shkroi në Facebook ministrja Xhaçka.

Ndërkohë, për ambasadoren Kim, ky program, që nuk është një dhurim, por një bashkëpunim dypalësh, përfaqëson shkëlqyeshëm dy aleatë që punojnë së bashku për të arritur qëllime të përbashkëta të sigurisë.

“Siç e dini, ky nuk është vetëm një dhurim i pajisjeve amerikane të mbrojtjes. Ky është një program i financuar bashkërisht, ku si Shtetet e Bashkuara ashtu edhe Shqipëria ndajnë përgjegjësinë financiare për të mbrojtur Aleancën… Shtetet e Bashkuara dhe Shqipëria qëndrojnë “krah për krah” sot, do të qëndrojmë “krah për krah” nesër dhe të gjitha të nesërmet që vijnë më pas”, shkroi ambasadorja në Facebook.