Vendimi i Kushtetueses, reagon Albin Kurti: Përtej imagjinatës, beteja jonë vazhdon bashkë me popullin

Kryeministri në detyrë, Albin Kurti ka reaguar një ditë pas vendimit të Gjykatës Kushtetuese që i hap rrugën Avdullah Hotit për të krijuar qeverinë e re.

Përmes një postimi në profilin e rij në Facebook, kryeministri në detyrë shprehet se Vetëvendosja nuk kishte pasur shpresa të mëdha në vendimin e Gjykatës Kushtetuese, por shton se ky vendim është përtej imagjinatës në nivel logjik e juridik.

Ai konfirmoi se beteja do të vazhdojë, bashkë me popullin e vetëdijësuar, kundër kësaj kaste të korruptuar.

“Gjykata Kushtetuese u rreshtua me kapësit e shtetit. Ajo foli për veten, më parë e më shumë sesa për çështjen që trajtoi. Ajo e vulosi veten, ajo e zhvlerësoi veten.

Beteja jonë vazhdon, bashkë me popullin e vetëdijësuar, kundër kësaj kaste të korruptuar. Për fund, ne njëmend nuk kemi pasur shpresa të mëdha për vendimin e Gjykatës Kushtetuese, mirëpo, ky vendim është përtej imagjinatës e nën çdo nivel (logjik e juridik).

Si i padrejtë, ai është i papranueshëm. Për hapat tjerë politik do të njoftojmë qytetarët në ditët në vijim”, shkroi z. Kurti.

Mund të lexoni gjithashtu:

Thaçi mirëpret vendimin e Gjykatës Kushtetuese: Na presin sfida të mëdha përpara. Asnjë reagim nga Albin Kurti

A do t’i bllokojë zyrat e qeverisë Vetëvendosja? Dimal Basha: Vendimet e padrejta nuk duhen respektuar