Protesta të dhunshme në SHBA, gazetarja e VOA: Trump u fsheh në bunkerin e nëndheshëm të Shtëpisë së Bardhë

Në shumë qytete amerikane vijojnë protestat e dhunshme kundër vrasjes së një afro-amerikani nga një polic. Jo vetëm Minesota, por rreth 30 vende janë përfshirë nga përplasjet mes qytetarëve dhe policisë.

Në një lidhje direkte nga Washingtoni Menada Zaimi, gazetare e Zërit të Amerikës tha se Washington DC vijon të jetë në shtetrrethim, pasi ka pasur protesta të shumta rreth Shtëpisë së Bardhë ku edhe janë dëmtuar shumë biznese.

Nisur nga situata e krijuar u aktivizua garda kombëtare dhe u arrestuan shumë persona pas konfrontimit me forcat e rendit.

Ndërkohë, sipas gazetares së VOA, mediat në SHBA kanë raportuar se të premten në mbrëmje presidenti amerikan, Donald Trump u fsheh në bunkerin e nëndheshëm të Shtëpisë së Bardhë për 1 orë për shkak të situatës së tensionuar jashtë Shtëpisë së  Bardhë.

“Janë të paktën 40 qytete që kanë vendosur shtetrrethim dhe orare nga qyteti në qytet, janë aktivizuar 5 mijë trupa të Gardës, nga 500 që u aktivizuan fillimisht në Mineapolis, aty ku ndodhi edhe vrasja e 46-vjeçarit afro-amerikan.

Ka pasur protesta të dhunshme, plaçkitje, por është raportuar edhe për rritje të dhunës së pajustifikuar të policisë ndaj protestuesve si në rastin e New York ku kryebashkiaku tha se është duke u hetuar sjellja e policisë”, – tha gazetarja e VOA.

Ajo tha se shumë nga incidentet e dhunshme janë raportuar si të lidhura me grupe ekstremiste të të djathtës ekstreme, por këto akuza kërkohet që të provohen.

Mund të lexoni gjithashtu:

SHBA në shtetrrethim, protesta të dhunshme në 30 qytete pas vrasjes së Floyd

Vrasja e Floyd, manifestime para ambasadave amerikane në Berlin e Londër