Investimet e huaja në Shqipëri u rritën me mbi 12% në vitin 2021

Investimet nga bizneset e huaja arritën në 9.5 miliardë euro vitin e kaluar, me rritje mbi 12 %. Zvicra dhe Holanda ishin dy shtetet që hodhën më shumë para në vend, ndërsa Greqia pakësoi investimet duke tërhequr disa prej kompanive të saj.

Në vitin 2021 investimet e huaja direkte kapën vlerën 9.53 miliardë eurove. Rritja vjetore ishte 12.5 %, krahasuar me vitin e pandemisë, ku u regjistruan 8.5 miliardë euro.

Stokun më të Lartë në Shqipëri, vitin e kaluar e kanë mbajtur Zvicra, Holanda, Kanadaja, Italia dhe Turqia. Edhe investimet e SHBA në vend kanë shënuar vlerë IHD rritëse.

Investimet me logo zvicerane ishin 1.76 miliardë euro dhe zunë 18% të totalit, ndërsa ato holandeze 16%.

Ecuria e investimeve zvicerane në vitet e fundit ka qenë e lidhur me ndërtimin e gazjellësit TAP, ndërsa holandezet lidhen në në pjesën më të madhe me kompaninë Statkraft, pronare e shoqërisë Devoll Hydropoëer.

Nga ana tjetër, Greqia është tërhequr nga biznesi në Shqipëri, duke tkurrur stokun me 204 milion euro. Njëlloj si Greqia, kanë reduktuar investimet edhe Bosnja, Panamaja e Kuvajti.

Investimet nga jashtë mbeten një tregues i rëndësishëm për rritjen e ekomomisë sonë dhe prej vitit të kaluar, vendi ynë filloi të aplikojë detyrimin që kompanitë të deklarojnë origjinën dhe pronarin final të kompanive të regjistruara në regjistrin tonë tregtar.

LEXONI GJITHASHTU

• 7 deputetë të PD-së i kërkojnë Kuvendit Komision për investimet strategjike
• BE ‘kërcënon’ Serbinë me tërheqjen e të gjithë investimeve