Shtohen kostot për bizneset që duhet të hapin llogari bankare

400 deri në 72 mijë lekë janë kostot që bizneset do të duhet të paguajnë për komisionet vjetore në banka.

Ligji i hyrë në fuqi më 26 korrik të këtij viti, detyron të gjitha bizneset me fitim mbi 2 milionë lekë të hapin llogari bankare.

Ky ligj është pjesë e një pakete masash për të luftuar fenomenin e pastrimit të parasë në Shqipëri.

Në kohën kur ky ligj u miratua në Komisionin e Ekonomisë, kryetari i këtij komisioni, Arben Ahmetaj, i kërkoi Ministrisë së Financave, që së bashku me guvernatorin e Bankës së Shqipërisë të detyrojnë bankat të ulin kostot e mirëmbajtjes së llogarive.

“Do duhet të uleni me guvernatorin e të detyroni sistemin bankar me instrumentet ligjore që keni, që kostoja e hapjes dhe mbajtjes së llogarive të ulet. Nuk duam që të shtojmë kostot për biznesin e vogël”.- deklaroi Ahmetaj.

Mirëpo, sipas një vëzhgimi të bërë nga Euronews Albania, në bankat e nivelit të dytë rezulton se tarifat e komisionit mujor të mirëmbajtjes së llogarive janë të pandryshuara, që nga muaji korrik i këtij viti.

Sipas ekspertit të ekonomisë, Banka Qëndrore nuk i detyron dot bankat e nivelit të dytë të ndryshojnë kostot e komisioneve.

Kështu, vlera më e ulët që do duhet të paguajë një biznes në muaj është 200 lekë dhe ajo më e lartë 6 mijë lekë.