Vazhdojnë protestat në SHBA, teksa polici tani akuzohet për vrasje të shkallës së dytë

Policia është përballur me rreth 1000 protestues që kanë sfiduar shtetrrethimin në Bruklin të Nju Jorkut.

Forcat e rendit kanë goditur demonstrues dhe gazetarë, pavarësisht faktit që protesta kishte qenë paqësore, sipas fotografit të Reuters që ndodhej në vendngjarje.

Nju Jorku ka vendosur një shtetrrethim në orën 20:00, për të ndaluar plaçkitjet që kanë ndodhur prej disa netësh.

Ndërkohë që protestat kanë vazhduar, katër policët e përfshirë në arrestimin e George Floyd, që çoi në vdekjen e tij, janë përballur me akuza më të rënda.

Derek Chauvin, polici që u filmua duke i vendosur gjurin mbi qafë e duke i peshuar me të gjithë trupin, ishte akuzuar fillimisht për vrasje të shkallës së tretë, që është vrasje nga pakujdesia, por pa qëllim për t’i shkaktuar dëme.  Ndërsa vrasja e shkallës së dytë përfshin edhe qëllimin. 

Tre policët e tjerë, të cilët vetëm sa ishin shkarkuar nga detyra, tani janë të akuzuar për vrasje nga pakujdesia.