Trump pranon që hyri në bunker, por vetëm për ta inspektuar

Presidenti amerikan, Donald Trump, ka pranuar në një intervistë për Fox News Radio se ka hyrë në bunker ditën e premte.

Por Trump tha se kishte shkuar vetëm për ta inspektuar, në formë vizite, jo për t’u fshehur nga protestuesit të cilët demonstruan të zemëruar për vdekjen e George Floyd nga arrestimi i dhunshëm i policisë.

“Janë lajme të rreme. Nuk shkova të premten në darkë. Shkova gjatë ditës, dhe vetëm për një kohë të shkurtër. Për inspektim. Gjatë ditës nuk kishte probleme”, tha presidenti amerikan.

Ai i kundërshtoi raportime se kishte shkuar për t’u strehuar nga dhuna e mundshme e protestës.

“Më thanë që mund të shkoja e t’i hidhja një sy, sepse një ditë mund të më duhej ta përdorja”, tha Trump.

New York Times ishte e para që raportoi se presidenti Trump ishte dërguar te bunkeri nga forcat speciale, vendi që njihet edhe si “Qendra Operacionale e Presidentit për Emergjenca”.

Trump shtoi se situata nga turma e protestuesve nuk kishte qenë aspak e rrezikshme për të, dhe se përveç Shërbimit Sekret, presidenti ka te Shtëpia e Bardhë edhe agjenci të tjera mbrojtjeje, që nga policia e Uashington DC.