Policia kthen 80 prej tifozëve të huaj që shkaktuan incidente në Tiranë

Rreth orës 04:00 të mëngjesit të sotëm, 80 prej tifozëve të huaj të cilët shkaktuan trazira dhe incidente mbrëmjen e së martës në Tiranë, janë nisur nga porti i Durrësit drejt vendeve të tyre.

Pas përplasjeve, policia e Tiranës në bashkëpunim me atë të Durrësit kanë bërë shoqërimin e tifozëve për në portin më të madh në vend. Prej aty, ata kanë udhëtuar drejt shteteve të tyre.

Mbrëmjen e djeshme u shënuan përleshjet e para midis tifozërive të Fejnordit dhe Romës me forcat e policisë.

Nga incidentet e shkaktuara, kanë mbetur të plagosur 10 punonjës policie si dhe është dëmtuar një automjet i policisë.

“Euronews Albania” ka mësuar se gjatë natës janë paraqitur në spitalin e Traumës 30 persona të dëmtuar, nga të cilët 20 efektivë policie. Ata kanë patur kryesisht dëmtime të lehta.

Efektivët janë trajtuar, observuar dhe më pas përcjellë me këshillat përkatëse. Aktualisht në spital nuk ndodhet asnjë i dëmtuar.

Gjithashtu, nga incidentet kanë mbetur të plagosur tre shtetas italianë dhe një holandez, i cili është transferuar në Sanatorium.

Ndërsa, 60 shtetas nga grupet e tifozëve të të dyja skuadrave, janë shoqëruar në ambientet e policisë, nga të cilët 48 italianë dhe 12 holandezë.

LEXONI GJITHASHTU

• Tirana nuk do të jetë e sigurtë nëse fiton Fejnordi, thotë tifozi holandez
• 10 policë të plagosur, 60 tifozë të shoqëruar
• Tifozët shkaktojnë kaos në kryeqytet, 2 efektivë të plagosur