Franca ndalon arrestimet me gjurin në qafë

Pas rasteve të rritura të dhunës policore në Francë gjatë ditëve të fundit, Ministri i Brendshëm francez, Christophe Castaner, tha se nuk ka përdorim të institucionalizuar të forcës në Francë. Gjatë konferencës së tij për shtyp, Castaner bëri thirrje për “zero tolerancë” ndaj veprimeve raciste nga oficerët e policisë, duke shtuar se ata që veprojnë ndryshe do të pezullohen ose do të merren masa më të rënda.

“Unë dua tolerancë zero kundër racizmit në vendin tonë. Unë dua që të gjithë ta dinë se kur dikush vesh uniformën, uniformën blu, askush nuk mund ta vendosë veten mbi të. Përkundrazi, ai  është i detyruar që më shumë se kushdo tjetër, të jetë shembullor ”.

Që javën e kaluar, disa qytete franceze kanë zhvilluar protesta të shumta nën moton “Black Lives Matter”, frymëzuar nga protestat në SHBA. Protestat franceze po bëjnë thirrje për drejtësi mbi vrasjen e francezit Adam Traore, i cili vdiq në vitin 2016 gjatë një operacioni policor.

Shumë njerëz e kanë krahasuar vdekjen e Traore me atë të afrikano-amerikanit George Floyd, i cili vdiq në duart e policisë. Castaner tha se metoda e policisë për të nënshtruar njerëzit duke i shtypur ata në qafë gjatë arrestimeve do të shpallet e ndaluar.