​PDK kërkon të mos votohet projektligji për pagën minimale në Kosovë

Partia Demokratike e Kosovës (PDK) i ka kërkuar Qeverisë së Kosovës që të tërheqë Projektligjin për pagën minimale, ta ndryshojë e më pas ta dërgojë në Kuvend.

Deputeti i PDK-së, Rashit Qalaj tha se si parti nuk do ta votojnë këtë projektligj pasi sipas tyre ky vendim është marrë në mënyrë arbitrare dhe pa u konsultuar me sindikatat dhe këshillin ekonomiko-social.

“Ky përcaktim i kësaj page minimale vjen pas propozimit që vije nga këshilli ekonomiko-social në të cilin kanë hise të barabarta apo janë hisedarë Qeveria e Kosovës, sindikatat dhe bizneset. Qeveria ka bërë propozimin në mënyrë arbitrare pa u konsultuar fare me këshillin ekonomiko-social dhe gjithmonë duke u sjellë në mënyrë arrogante që lartësia e pagës minimale të jetë 250 euro mirëpo duke përjashtuar disa kategori shumë të rëndësishme të vendit” tha Qalaj.

Qalaj shtoi se në këtë projektligj nuk janë përfshirë disa kategori e që janë të verbrit, tetraplegjikët, paraplegjikët dhe veteranët e luftës.

Partia Demokratike e Kosovës ka kërkuar edhe nga partitë opozitare që të kundërshtojnë në parim të Projektligjin për pagën minimale.

Qalaj i ka bërë thirrje edhe deputetëve të shumicës parlamentare të Lëvizjes Vetëvendosje që ta mbështetin PDK-në për ta kthyer këtë ligj për plotësim.

Në seancën e sotme plenare të Kuvendit të Kosovës është votimi në parim i projektligjit për pagën minimale.

Në të njëjtën kohë, veteranët e UÇK-së po mbajnë protestë, ku po kërkojnë që të përfshihen në skemën e pagës minimale.

LEXONI GJITHASHTU:

• ​Veteranët e UÇK-së protestojnë sot në Kosovë për pagën minimale