Vetëvendosje refuzon Hotin për dialogun me Serbinë, Kurti fton qytetarët në tubim

Lëvizja Vetëvendosje ka refuzuar kërkesën e qeverisë Hoti për të marrë pjesë në takime ku do të diskutohej për dialogun e ardhshëm me Serbinë.

Lajmin e ka bërë të ditur zëdhënësi i VV-së, Arlind Manxhuka përmes një statusi në rrjetin social “Facebook”, duke thënë se një qeveri e varur dhe mundësuar nga votat e Listës Serbe dhe e formuar nga Thaçi, nuk ka kredibilietitn dhe legjitimitetin e duhur.

“Në selinë qendrore të Lëvizjes VETËVENDOSJE! kemi pranuar një letër para dy ditësh ku ftohej Kryetari i LVV, Albin Kurti që të diskutojë me qeverinë aktuale për dialogun e ardhshëm me Serbinë. Një qeveri e varur dhe mundësuar nga votat e Listës Serbe dhe e formuar nga Thaçi e për të si dhe një qeveri që ia heq shtetit të Kosovës reciprocitetin me Serbinë nuk ka as kredibilitet as legjitimitet. Prandaj ne nuk i jemi përgjigjur asaj ftese sepse nuk do të jemi pjesë të këtyre takimeve”, shkruan ai.

Nga ana tjetër, ish-kryeministri, Albin Kurti, ka ftuar qytetarët të marrin pjesë nesër në tubimin e thirrur për ndër të 21-vjetorit të çlirimit të Kosovës dhe për 15-vjetorin e themelimit të Lëvizjes Vetëvendosje.

Përmes një video-mesazhi, kreu i VV-së thotë se tubimi do të jetë paqësor, ndërsa fton qytetarët të respektojnë masat e distancimit social.

“Tubim publik paqësor, të premten, në sheshin “Skënderbeu”, në ora 17:00, për të shënuar 21 vjetorin e çlirimit të Kosovës e 15 vjetorin e formimit të VETËVENDOSJE!-s”, shkruan ish-kryeministri Kurti.