Banorët e Kherson pajisen me pasaportat e para ruse

Rusia shpërndau të shtunën pasaportat e saj të para për banorët e Khersonit, një qytet i pushtuar nga trupat e Moskës në Ukrainën jugore.

Sipas agjencisë zyrtare të lajmeve TASS, 23 banorëve të Khersonit i’u dhanë pasaporta ruse në një ceremoni, një “procedurë e thjeshtuar” e mundësuar nga një dekret i nënshkruar nga presidenti rus Vladimir Putin në fund të majit.

“Të gjithë banorët tanë në Kherson duan të marrin një pasaportë dhe shtetësi ruse sa më shpejt të jetë e mundur. Kjo është një epokë e re për ne. Është dokumenti më i rëndësishëm që një person ka në jetën e tij”, tha Vladimir Saldo, kreu i administratës pro-ruse të rajonit.

Sipas autoriteteve pro-ruse në Kherson, data për lëshimin e pasaportave të para ruse u zgjodh në datën e shënuar të Rusisë e cila feston pavarësinë e vendit, raporton Euronews.

Dekreti i nënshkruar nga Kremlini në fund të majit, i cili autorizonte autoritetet lokale pro-ruse për të shpërndarë pasaportat për banorët, kishte të bënte gjithashtu me rajonin e Zaporizhzhia, i cili kontrollohet pjesërisht nga Moska.

Ukraina e kishte denoncuar futjen e kësaj proçedure speciale si një “shkelje flagrante” të integritetit të saj territorial.

“Dekreti presidencial rus është ligjërisht i pavlefshëm dhe nuk do të ketë pasoja” mbi “shtetësinë e banorëve të territoreve të pushtuara përkohësisht nga Rusia”, tha Ministria e Jashtme e Ukrainës.

LEXONI GJITHASHTU

• Von der Leyen takim me Zelenskin për anëtarësimin në BE të Ukrainës
• Po humbasim deri në 200 ushtarë në ditë, thotë zyrtari ukrainas