Rindizen protestat në SHBA, vrasja nga policia e një tjetër afro-amerikani në Atlanta zemëron qytetarët

Protestat në SHBA janë rindezur sërish pas vrasjes së një afro-amerikani nga një polic i bardhë në Atlanta.

Rayshard Brooks u qëllua të premten që shkoi, pasi po përpiqej t’i shpëtonte arrestimit.

Momenti i regjistruar në kamera nxiti sërish zemërim tek amerikanët dhe çoi në dorëheqjen e shefit të policisë.

Pamjet tregojnë një burrë që përpiqet t’u largohet dy oficerëve të policisë, ndërsa në një dorë mban një objekt dhe duket se e drejton ndaj një oficeri.

Më pas oficeri qëllon në drejtim të personit që është duke vrapuar dhe ky i fundit bie në tokë në parkimin e restorantit. Sipas zyrtarëve, 27-vjeçari i kishte rrëmbyer njërit prej policëve një pajisje që shërben si armë elektrike dhe dukej se ia kishte drejtuar oficerit ndërsa vraponte, gjë që shkaktoi sipas autoriteteve reagimin e policëve.

Restoranti  Wendy në Atlanta, ku u qëllua 27-vjeçari Brooks, u shkatërrua pasi iu vu zjarri nga të paktën 150 demonstrues.

Ngjarja vjen vetëm pak ditë pas vrasjes së George Floyd në Minneapolis, pasi një oficer i policisë e shtrëngoi fort në qafë duke e lënë të vdekur. Pas këtyre episodeve ligjvënësit po debatojnë se si të reformojnë sistemin e drejtësisë i cilësuar nga kritikët si një sistem që vepron kundër qytetarëve të varfër dhe pakicës.