Statusi i Ukrainës nuk shqetëson Rusinë: BE dhe NATO, si Hitleri kundër BS-së

Rusia duket se nuk është e shqetësuar nga dhënia e statusit të vendit kandidat për Ukrainën, pas vendimit unanim të marrë të enjten nga liderët e BE-së në samitin e Këshillit Evropian. Në reagimin e parë, Kremlini ka vlerësuar se dhënia e statusit është çështje e brendshme e Unionit.

“Këto janë çështjet e brendshme të Evropës. Është jetike që këto procese të mos sjellin probleme të tjera për ne dhe për marrëdhëniet mes vendeve të përmendura dhe Rusisë, pasi aktualisht probleme ka boll. Është me rëndësi të mos shkojmë drejt përkeqësimit të mëtejshëm të marrëdhënieve me BE-në, sepse një gjë e tillë është shumë e lehtë”, u shpreh Dmitry Peskov, zëdhënës i Kremlinit.

Edhe ministri i Jashtëm rus, Sergei Lavrov vlerësoi se ndryshe nga NATO, BE nuk është një aleancë ushtarake dhe rrjedhimisht statusi nuk përbën kërcënim për Rusinë. Por gjatë një vizite në Baku, ai nuk i kurseu kritikat për Perëndimin.

“Kur filloi Lufta e Dytë Botërore, Hitleri dhe kabineti i tij mblodhi pjesën dërrmuese të vendeve evropiane për të sulmuar Bashkimin Sovjetik. Kjo ngjason me situatën aktuale. Sot, BE dhe NATO po formojnë një koalicion të tillë për  të luftuar në përmasa të mëdha kundër Rusisë”, tha Sergei Lavrov, ministër i Jashtëm i Rusisë.

LEXONI GJITHASHTU:

• Rusia pretendon se shkatërroi avionët e dërguar nga perëndimi
• Presidenti i Lituanisë: Vendi i përgatitur për çdo veprim armiqësor nga Rusia