Liderët e G7-s në Gjermani, konfirmohet mbështetja për Ukrainën

Fillimisht me foto dhe më pas në tryezën e rrumbullakët, liderët e 7 vendeve më të industrializuara të botës u takuan të dielën në kështjellën Elmau të Alpeve bavareze.

Në fokus të ditës së parë të samitit të G7-s, që do të zgjasë deri më 29 qershor, ishte padyshim lufta në Ukrainë, me të gjithë liderët që shprehën mbështetjen e tyre për Kievin.

“Ne do të qëndrojmë përkrah Ukrainës për sa kohë të jetë e nevojshme”, deklaroi në Tëitter presidentja e Komisionit Evropian Ursula von der Leyen.

Në të njëjtën linjë u shpreh edhe kryeministri britanik Boris Johnson.

Ndërkohë, në një dalje për mediat presidenti i Këshillit Evropian akuzoi Rusinë se po përdor ushqimin si armë lufte.

“Kremlini po e përdor ushqimin si armë. Ne duhet t’i kundërvihemi propagandës ruse për çmimet e ushqimeve dhe fertilizuesve. Lojërat e rrezikshme të urisë nën regjinë e Moskës janë i vetmi shkak për krizën ushqimore botërore. Familje të tëra rrezikojnë vdekjen nga uria. Për këtë arsye BE po kërkon rrugë alternative për grurin ukrainas”, tha Charles Michel, president i Këshillit Evropian.