Remitancat në vitin 2018, mbi 1 milionë emigrantë dërguan 1.24 miliardë euro, 35% erdhën nga Italia

Remitancat përbëjnë fluksin më të madh hyrës në ekonominë shqiptare, duke lënë pas investimet e huaja direkte dhe eksportet.

Sipas Bankës së Shqipërisë dhe të dhënave për vitin 2018, rezulton se ato ishin burim të ardhurash për rreth 26 për qind të familjeve shqiptare, duke u renditur si fluksi financiar më i qëndrueshëm dhe më i sigurt në ekonominë shqiptare.

Në total, 1.19 milionë emigrantë shqiptarë kanë sjellë 1.24 miliardë euro fluks remitancash në vitin 2018, që kanë ndihmuar në reduktimin e varfërisë, përmirësimin e shëndetit, rritjen e arsimit dhe rritje gjithëpërfshirëse.

Nga totali, 35 për qind e remitancave vijnë nga Italia, 32 për qind nga Greqia, 8 për qind nga Mbretëria e Bashkuar, 6 për qind nga Gjermania, 10 për qind nga Shtetet e Bashkuara të Amerikës.

Kanalet kryesore të dërgesave janë operatorët e transferimit të parave në masën 57 për qind, ndërsa 39 për qind dërgohen fizikisht.

Një pjesë akoma më e vogël, 4 për qind, vjen përmes sistemit bankar. Kostoja e dërgesave rezulton 8.9 për qind.