Zëvendësministrja Vasilika Vjero: Rreth 230 mijë persona përfituan nga paketat e ndihmës financiare

Në një intervistë për gazetaren Esmeralda Mulaj në Euronews Albania, zëvendësministrja e ekonomisë Vasilika Vjero foli për paketat e ndihmës financiare të parashikuara nga qeveria, skemën e garancisë sovrane si dhe për shifrat e të papunëve që u shtuan gjatë periudhës së pandemisë.

Si fillim Vjero u shpreh me siguri se paketat e ndihmës financiare po ecin sipas planeve të qeverisë.

“Janë më shumë se 132 mijë përfitues nga paketa e dytë financiare dhe besoj se për të dy paketat numri do të shkojë deri në 230 mijë, ky është numri total,” – tha zëvendësministrja Vjero.

Data 5 qershor ishte afati i fundit ku kompanitë duhej të aplikonin për të përfituar ndihmën financiare prej 40 mijë lekësh për punonjësit e tyre. Kryeministri Edi Rama qe shprehur se tatimet do të gjobisnin këdo kompani që nuk do të aplikonte, mirëpo zëvendësministrja nuk dha informacione nëse deri më sot një masë e tillë ishte zbatuar apo jo.

“Në këto momente e rëndësishme është që tatimet identifikuan të gjithë të punësuarit dhe të gjithë po marrin ndihmën financiare. Nuk është qëllimi vendosja e masave por shpërndarja e këtyre ndihmave në momente të vështira,” – u shpreh Vjero, e cila tha se pagesat e muajit të tretë janë duke u përmbyllur dhe se tatimet kanë shqyrtuar rreth 11 mijë ankesa.

Shifrat e papunësisë mbeten sërish të luhatshme dhe “jopërfundimtare”. Pavarësisht se ka rreth 3 muaj që vendi gjendet në pandemi, qeveria duket se nuk ka ende një shifër zyrtare se sa u rrit papunësia në këtë periudhë.

Zëvendësministrja Vjero tha se janë rreth 27 mijë të papunët në këtë periudhë, por ajo theksoi se kjo nuk është e dhëna përfundimtare, pasi bazohet kryesisht në listpagesat e deklaruar. Për një shifër “të certifikuar” pritet raporti i gjashtëmujorit nga Instituti i Statistikave, raport që do të dalë në fund të muajit qershor.

E pyetur se çfarë ka në plan qeveria për t’i ndihmuar këto persona, Vjero tha se parashikohet pagesa e papunësisë, aftësimi profesional dhe përfshirja në skemat e punësimit në zyrat e punës. Vjero përmendi si sektor të mundshëm për hapje vendesh pune programin e rindërtimit.

Më tej zëvendësministrja foli për ndihmën ekonomike që qeveria parashikon për të ndihmuar bizneset.

Sipas qeverisë mbi 400 sipërmarrës kanë përfituar skemën e garancisë sovrane, e cila parashikohej për likuiditet të një periudhe rreth 3 mujore për paga apo shpenzime të menjëhershme. Mirëpo zëvendësministrja Vjero tha se është parashikuar një garanci e dytë sovrane deri në 300 milionë lekë me periudhë 5-vjeçare, norma interesi jo më shumë se 5 për qind dhe me fokus mbulimin e investimeve.

“Kuadri i dytë i garancisë sovrane është miratuar nga qeveria dhe tashmë janë duke u miratuar edhe ndryshimet e fundit që do ta bëjnë efektive për bankat dhe tatimpaguesit, të cilët kanë shfaqur interes të madh,” – tha zëvendësministrja e cila pranoi se ende nuk ka pasur aplikime, por theksoi se garancia e dytë kryesisht parashikohet për sipërmarrjet e mëdha.

Lexoni gjithashtu:

Bien të ardhurat, 220 milionë euro më pak në arkat e shtetit, shkak pandemia e COVID-19