Ekonomia rritet me 5.97%, ndërtimi dhe tregtia peshën kryesore, ngrin bujqësia

Ekonomia është rritur me një normë vjetore 5.97% për periudhën janar-mars të këtij viti.

Sipas Institutit të Statistikave, kontributin kryesor në zgjerimin e prodhimit kombëtar të vendit e ka pasur ndërtimi dhe sektorë që lidhen me të.

Ndërtimi u rrit me 25.5% në terma vjetorë dhe shit-blerja e pasurive të patundshme me 14.8%.

Shpenzimet qeveritare për rindërtimin në këtë periudhë ishin 2 herë më të ulëta se një vit më parë, ndërsa fondet për vepra publike në infrastrukturë u ulën me 40%, çka bën që rritja e ndërtimit të jetë mbështetur ose nga aktiviteti i sektorit privat, ose nga rritja e çmimeve.

Dega e dytë me kontributin më të madh në ekonomi është tregtia me transportin, të cilat u rritën me 10.5%.

Tregtia e mallrave dhe sektori i transportit janë rritur me 150 milion euro krahasuar me një vit më parë.

Bujqësia vijon të mbetet në stanjacion, edhe pse çmimet e produkteve janë rritur, baza vjetore e rritjes së këtij sektori është 0.11% dhe u tkurr me 0.14% krahasuar me fundin e vitit të shkuar.

Tkurrje vjetore pati edhe arsimi, shëndetësia dhe artet.

Industria dhe energjia kanë shënuar rritje me 1.4%, të ndikuara nga rritja e eksporteve të lëndëve të para.

Konsumi i popullatës për muajt e parë të vitit është shtuar me 8.6%, por kjo tendencë mund të ulet në pjesën tjetër të vitit.

LEXONI GJITHASHTU:

• Presidentja e KE-së: Ekonomia ruse po degradon për shkak të sanksioneve
• 4.9% rritja ekonomike globale për 2022, parashikon FMN