Raporti për sundimin e ligjit, KE: Polonia dhe Hungaria hapa prapa

Polonia dhe Hungaria janë sërish në fokusin e BE lidhur me sundimin e ligjit. Sipas raportit vjetor të Komisionit Evropian, dy vendet po dështojnë në adresimin e shqetësimeve që kanë të bëjnë me gjendjen e demokracive të tyre.

Në rastin e Polonisë, situata nuk po përmirësohet. Varshava zyrtare po përballet me një gjobë prej 1 milion eurosh në ditë, e vendosur nga Gjykata Evropiane e Drejtësisë për mungesën e pavarësisë së gjyqësorit të saj. Shuma e akumuluar ka arritur në 300 milionë euro.

“Ne vazhdojmë t’iu kërkojmë të paguajnë gjobën, por qëllimi ynë nuk është gjoba. Qëllimi është përmbushja e kërkesave të Gjykatës së Drejtësisë, që çon tek ndërprerja e procedurës,” – tha Didier Reynders, komisioneri i BE për Drejtësinë.

Por gjobat në vetëvete nuk e ndryshojnë situatën në një plan afatgjatë. KE aprovoi së fundmi planin e rimëkëmbjes të post pandemisë për Poloninë, me vlerë 35.6 miliardë euro, në përpjekje për ta bindur vendin të zgjidhë problemin. Por Brukseli thotë se shumica e akuzave mbeten, ndaj dhe Unioni nuk i ka lëvruar paratë.

 “Përsa kohë paratë do të mbahen, nuk do të ketë asnjë stimul që këto qeveri të ndryshojnë. Por në rastin e Polonisë shtrohen disa pyetje politike. A meriton ajo më shumë mbështetje për shkak të asaj që po bën për Ukrainën? A është e rëndësishme që Polonia të mbahet një vend i qëndrueshëm për hir të pozicionit strategjik? Këto janë pyetje legjitime nga një këndvështrim politik, që Komisioni mund ta marrë në konsideratë. Por kjo do të thotë se zbatimi i rendit dhe ligjit do të vijojë të vuajë,” – u shpreh analisti Garvan Walshe.

Hungaria është vendi tjetër i BE që kritikohet në raport. Korrupsioni, mungesa e lirisë së medias dhe pushteti i tepruar i qeverisë së Viktor Orban mbeten shqetësimet kryesore në Bruksel.

Por Budapesti zyrtar, që s’ka shpresë të sigurojë ndihmën prej 7.2 miliardë eurosh post pandemisë, ka nisur të ndjejë mungesën e fondeve të BE-së.

LEXONI GJITHASHTU:

• Raportuesit e KE: Korrupsioni problem kryesor, shqetësim dhe mjedisi mediatik