Kupa e Shqipërisë, Teuta-Vllaznia dhe Skënderbeu-Bylis takimet më interesante të çerekfinaleve

Të mërkurën, ora 16:30, përcaktohen skuadrat gjysmëfinaliste të Kupës së Shqipërisë. Vëmendja do të jetë në Durrës dhe në Korçë ku çështja e kualifikimit mbetet ende e hapur.

Pas barazimit 2-2 në stadiumin Loro Boriçi të Shkodrës, Teuta pret Vllazninë në “Niko Dovana” të Durrësit, në një takim mjaft interesant.

Të ashtuquajturit “Djemtë e detit” e kanë deklaruar objektiv Kupën e Shqipërisë, ndërsa shkodranët në krahun tjetër e shohin si mundësi për të shpëtuar sezonin.

Në Korçë Skënderbeu synon përmbysjen e rezultatit ndaj Bylist, që në Ballsh fitoi 1-0 dy javë më parë.

Korçarët kanë treguar se në shtëpinë e tyre janë skuadër më e mbledhur dhe është mjaft e vështirë që për këdo që të marrë rezultat.

Kukësi në anën tjetër duhet të menaxhojë rezultatin e ndeshjes së parë në “Elbasan Arena” ku do të presë Apoloninë.

Verilindorët kanë fituar 2-1 takimin e parë në Fier.

Ndërkohë pritet të jetë vetëm formalitet kualifikimi për Tiranën, që do të vizitojë Lezhën. Bardheblutë kanë fituar 5-1 në sfidën e parë në kryeqytet dhe trajneri Emanuel Egbo me shumë gjasa do u japë hapësira lojtarëve që kanë pasur pak mundësi deri më tani.