India, vendi i dytë që kalon dy miliardë injektime anti-COVID

India ka administruar më shumë se dy miliardë doza vaksinimi kundër COVID, duke u bërë vendi i dytë që ka arritur këtë shifër pas Kinës.

“Kjo ka forcuar luftën globale kundër COVID-19”, shkroi në Twitter kryeministri Narendra Modi të dielën.

Arritja e Indisë vjen mes një rritje të infektimeve në shumë shtete.

Qeveria u ka kërkuar shteteve të rrisin mbikëqyrjen e infeksioneve. Ajo gjithashtu është përpjekur të zgjerojë programin e dozës përforcuese në të gjithë vendin.

Javën e kaluar, India filloi një përpjekje për të dhënë doza përforcuese falas – ose doza paraprake, siç e quan qeveria – për të gjithë të rriturit për 75 ditë. Periudha kohore është për të shënuar 75 vjetorin e pavarësisë së vendit më 15 gusht.

Deri më tani, vetëm punëtorët e vijës së parë, punonjësit shëndetësorë dhe njerëzit mbi 60 vjeç kishin të drejtë për doza përforcuese falas. Të tjerët duhej të paguanin për të.

Masa erdhi disa ditë pasi vendi shkurtoi hendekun midis dozave të dyta dhe të treta të vaksinës në gjashtë muaj nga nëntë.

Gazeta Hindustan Times raportoi javën e kaluar se 92% e indianëve që kishin të drejtë për një dozë përforcuese nuk e kanë marrë ende atë.

Mbi 55 milionë doza përforcuese janë administruar deri më tani që nga fillimi i programit në janar. Aksioni fillimisht ishte i hapur për punonjësit e kujdesit shëndetësor dhe të vijës së parë, dhe ata mbi 60 vjeç me sëmundje shoqëruese. Më vonë u zgjerua për të gjithë të rriturit.

Sipas ministrisë së Shëndetësisë të Indisë, 98% e të rriturve kanë marrë të paktën një dozë të vaksinës COVID, ndërsa 90% janë vaksinuar plotësisht.

Ndërkaq, Kina ka administruar rreth 3.4 miliardë doza të vaksinës deri më tani.

LEXONI GJITHASHTU:

• ‘Vjeshtë sfiduese’, paralajmërimi i OBSH-së për COVID-in në Evropë