Gjermania kritikon Erdoganin për daljen në foto me Putin dhe liderin e Iranit

Ministrja e Jashtme e Gjermanisë, Analena Burbock ka kritikuar presidentin turk, Rexhep Tajip Erdogan për daljen e tij në foto me homologun rus, Vladimir Putin dhe atë të Iranit,  Ebrahim Raisi.

Burbock u shpreh se fotoja e realizuar në Teheran, është e pakuptimtë, pasi Turqia po ndihmon Ukrainën në luftën kundër Rusisë, shkruan ZDF.

Sipas saj, fakti që presidenti turk është në këtë foto, përbën një sfidë.

“Foto tregon gjithashtu se sa e rëndësishme është që ne të qëndrojmë së bashku me partnerët e vlerave, të cilët jo vetëm që besojnë në rregullat ndërkombëtare, por qëndrojnë në mbrojtje të tyre”, theksoi ajo.

Putin vizitoi në Iranin të martën, udhëtimi i tij i parë ndërkombëtar përtej kufijve të ish-Bashkimit Sovjetik që nga fillimi i pushtimit të Ukrainës.

Ai u takua me presidentin iranian Ebrahim Raisi dhe atë turk Rexhep Tajip Erdogan.

Në fokus të bisedimeve ishin çështje të ndryshme, që nga lufta në Siri deri tek konflikti në Ukrainë dhe propozimi i mbështetur nga OKB për rifillimin e eksporteve të grurit ukrainas.

LEXONI GJITHASHTU

• 40 mld dollarë marrëveshje mes Rusisë dhe Iranit për naftën
• Putin vizitë në Teheran, bisedime me presidentin iranian dhe turk për sigurinë