Lideri i Al-Kaedës i vrarë me dron, truri i sulmeve të 11 shtatorit

Ayman al-Zawahiri, i cili drejtoi Al-Kaedën dhe ndihmoi në planifikimin e sulmeve terroriste të 11 shtatorit, është vrarë në një sulm me dron në Afganistan, konfirmoi të hënën Presidenti i Shteteve të Bashkuara, Joe Biden.

Ai u vra në një operacion kundër terrorizmit të CIA-s në kryeqytetin afgan, Kabul të dielën.

Zawahiri ndihmoi në organizimin e sulmeve shkatërruese të 11 shtatorit me shtetasin saudit Osama Bin Laden. Ai mori drejtimin e grupit terrorist ndërkombëtar Al-Kaeda pas vrasjes së Bin Ladenit në vitin 2011.

Biden tha se kishte ndezur jeshile për “goditjen e saktë” ndaj liderit 71-vjeçar të Al-Kaedës, i cili sipas zyrtarëve amerikanë ishte në ballkonin e një shtëpie të sigurt kur droni qëlloi dy raketa drejt tij.

Presidenti amerikan tha se vrasja e Zawahirit do të jetë një ngushëllim për familjet e rreth 3 000 viktimave të sulmeve të vitit 2001 në Nju Jork.

“Pavarësisht se sa kohë duhet, pavarësisht se ku fshiheni, nëse jeni një kërcënim për popullin tonë, Shtetet e Bashkuara do t’ju gjejnë dhe do t’ju nxjerrin jashtë”, tha Biden.

Sipas zyrtarëve amerikanë, asnjë person tjetër nuk u vra apo u dëmtua në sulmin me dron, megjithëse anëtarë të tjerë të familjes së Zawahirit ishin të pranishëm në objektin e goditur.

LEXONI GJITHASHTU:

• SHBA vret liderin e Al-Kaedës në një sulm me dron