‘Kërcen’ fatura për importet, Shqipëria ble 18 mln euro energji për një javë

Për 7 ditët e para të gushtit, blerja e energjisë i ka kushtuar vendit 18 milionë euro. Kjo është fatura më e lartë që ka paguar ndonjëherë Shqipëria për importet e energjisë.

Korporata Elektroenergjitike ka blerë 35 mijë megavat orë energji, për datat 1 deri në 7 gusht me një çmim 520 euro për megavat.

Ky është çmimi më i lartë që është paguar ndonjëherë për energjinë elektrike.

KESH ka rritur në 12 mijë megavat orë prodhimin e energjisë ditore, për të ulur nevojën për importe, por sërish kjo sasi është e pamjaftueshme që të përmbushë kërkesën për konsum.

Niveli i liqenit të Fierzës është ulur me 10 metra që prej nisjes së sezonit veror, ndërsa prurjet në basenet e hidrocentraleve kanë arritur minimumet historike.

Në Fierzë prurjet ditore janë 40 m3/s, 20 m3/s në Koman dhe 5m3/s në Vaun e Dejës.

Aktualisht, rezerva hidrike ka shkuar në 806 gigavat orë. Me këtë sasi vendi mund të furnizohet me energji për vetëm 43 ditë.

Në mes të korrikut qeveria i kaloi KESH-it një fond me vlerë 160 milion euro për të kryer importet e energjisë në këtë periudhë dhe për të shlyer faturat e qershorit.

Para që janë të mjaftueshme deri në fillim të vjeshtës, kohë kur Korporata pret fillimin e reshjeve dhe mbushjen e hidrocentraleve.

LEXONI GJITHASHTU

• Qeveria i jep 160 mln euro KESH-it për blerjen e energjisë
• 3.5 milionë euro në ditë, KESH ble energji me çmime rekord